URRIAREN 21ean egingo den edizio honetan ere, Oinez berezi bat izatea nahi dugu, legalizazioaren Oineza, Euskal Herri guztiarentzako Oinez indartsu eta erakargarri bat, aurreko Oinezean izan genuen jende kopurua gaindituko duen Oineza.

Nafarroa Oinez-a Nafarroako Ikastolek urtero ospatzen duten jairik handiena da.

Oinezeko helburura ikastoletako azpiegitura eta ekonomia-beharrei erantzutea da.

Ospakizuna eta antolaketa Nafarroako Ikastolen Elkarteko Ikastolen artean txandakatzen da urtetik urtera, Ikastola bakoitzaren beharren arabera.

Nafarroa Oinez-a ez da egun bakarrera mugatzen; aitzitik, urtean zeharreko ekintza desberdinek osatzen duten festa bat da. Mota eta gustu desberdinetako ekintzak antolatzen dira, aurten egingo direnak adibidez: artisau azoka, rock kontzertua, herri kirolak, umeentzako jaialdia, bizikleta martxa, arte erakusketa…

Horretaz gain, urte osoan zehar, arropa, liburuak eta beste produktu asko jartzen dira salgai.

Nafarroa Oinez egunerako, ibilbide bat prestatzen da Ikastola kokatua dagoen herrian zehar. Ibilbidean gune desberdinak izaten dira, eta horietako bakoitzean egunean zehar hainbat ekitaldi eta zerbitzu aurkituko ditugu.

92ko Nafarroa Oineza historikoa izan zen, gizartean eta kulturan izan zuen eraginagatik. Zabaldu zen mezuarengatik, abestiarengatik, Ikastola zegoen egoerarengatik…. Esan dezakegu, Nafarroa Oinez hark garai bat markatu zuela.

Ikastolarentzat erabakigarria izan zen, txerritoki batean ezarritako geletatik , behar bezalako baldintzak betetzen zituen eraikuntza batera pasatzea ekarri zuen.

Vianako hiriarentzat ere, iragan eta etorkizun bat markatu zuen Oinezak. Euskararen kultura hirira hurbildu zen, hiriak Oineza zer zen ezagutu zuen, bizilagunek jaiaz ospatu zuten…

Edizio honetan ere, Oinez berezi bat izatea nahi dugu, legalizazioaren Oineza, Euskal Herri guztiarentzako Oinez indartsu eta erakargarri bat, aurreko Oinezean izan genuen jende kopurua gaindituko duen Oineza.

Ziur gaude, Oinezak Ikastolaren proiektuaren behin betirako egonkortasuna ekarriko duela.

Urtetik urtera, Erentzun Ikastolako ikasle kopurua hazten joan da poliki-poliki, genituen aurreikuspenak hautsiz. Horrekin batera, gizartearen eskaerari erantzunez, 0-3 zikloa ezarri genuen gure ikastolan, eta izan duen arrakastak, leku arazo berriak sortu dizkigu.

Egoera horren ondorioz, baditugu beharrak, premiazko erantzuna eskatzen dutenak: gela gehiago, zabalagoa, patio estalia...

Laburbilduz, gaur egungo eraikina txiki gelditu zaigu.Horregatik, 2007ko Nafarroa Oinezen helburua eraikin berri bat egitea da.

• Haur Eskolak (0-3) eta Haur Hezkuntzak behar dituzten gelak izateko, patio estali eta guzti.
• Bestetik, oraingo eraikineko Lehen Hezkuntzako gelak zabaltzeaz gain laborategiak, jangelak, sukaldeak, eta abarrek beraien kokalekua izango dute. Azkenik, patioak estaliko dira haurrak babestuago egoteko.

Ikastola honen ibilbidean, militantzia, elkarlana eta ahaleginak batzea izan dira gure proiektuaren arrakastaren elementu garrantzitsuenak. Hemendik aurrera, aipaturikoaz gain, azpiegitura egokiak ere behar ditugu, euskarazko kalitatezko hezkuntza bermatu ahal izateko (ezin ahaztu non gauden) eta gure eskaintza ahalik eta familia gehienei zabaltzeko.

Webgunean ikusten dituzuen logoa eta leloa izango ditu 2007ko Nafarroa Oinez-ek. Logo eta lelo horiek Ikastolan antolatutako lehiaketa baten bidez hautatu dira, eta guraso baten ideia izan dira. Logoan giltza eta sarraila ditugu eta leloa "Giltza daukagu" esaldia da.

Horretaz gain, aurtengo kartelak Viana hiriaren silueta darama, Ikastolak gure hiriarekin duen atxikimenduaren adierazle gisa.

Bukatzeko, urtean zehar gure ekitaldiak animatuko dituen "Giltzi" maskotarekin osatzen da kartela.

Zuen buruari galdetuko diozue… Zeren "Giltza daukagu"? lelo horrek hainbat esanahi ditu. Guk, lelo horrekin, zera esan nahi dugu:

• Vianako eskualdean euskararen atea irekitzeko giltza daukagula
• Gure seme-alabek euskaraz ikasteko beharrezkoa daukaten giltza
• Kalitatezko euskarazko hezkuntza eskaintzeko giltza eta…

Azken finean, euskaldun guztiok, geurea dugun hizkuntza zabaltzeko… "giltza daukagu".